E nisur thuajse dy sezone më parë ka përfunduar më në fund telenovela e rinovimit të kontratës së portierit spanjoll David De Gea, me klubin e Manchester Unitedit.
Kështu gardiani 29-vjeçar ka pranuar më në fund të hedhë firmën mbi kontratën e re, që do ta mbajë lidhur me “djajtë e kuq” deri në verën e vitit 2023, me opsionin për zgjatjen edhe me një tjetër sezon.
“Tani e ardhmja ime është vendosur. Dua të ndihmoj këtë skuadër të arrijë fitore të tjera. Dua të jem si një guidë për të rinjtë që do të vijnë, për t’i bërë të kuptojnë se ku kanë mbërritur”, deklaroi De Gea, duke pranuar se ka firmosur kontratën e re tashmë.
David De Gea iu bashkua Manchester United-it në verën e 2011-ës dhe që atëherë është shndërruar në një pikë kyçe të formacionit të skuadrës angleze, ndërsa me kontratën e re, pritet të shkojë drejt mbylljes së karrierës në “Old Trafford”.
Kontrata e De Geas me Manchester United përfundoi këtë verë, por “djajtë e kuq” vendosën të shfrytëzojnë klauzolën e zgjatjes së saj edhe për një vit tjetër, ndërsa në pritje të shifrave zyrtare, në Angli këmbëngulin se me kontratën e re portieri do të përfitojë 13.5 milionë paundë neto në sezon, duke u bërë një nga më të paguarit në skuadër.
