Drejtori Sportiv i Udineses, Pierpaolo Marino jep ende shpresë për Milanin, pasi në një intervistë për mediat italiane, ka zbuluar se marrëveshja me Atleticon e Madridit për shitjen e De Paul nuk është mbyllur ende.
Klubi kampion në fuqi i Spanjës ka avancuar negociatat me friulianët dhe njëkohësisht ka arritur marrëveshje edhe me De Paul për një kontratë 5-vjeçare me pagë prej 3.5 milionë eurosh në sezon, por nuk ka sistemuar ende të gjithë detajet e transferimit.
“Me Atleticon jemi në negociata, por nuk kemi mbyllur asgjë dhe edhe klubet e tjera janë në lojë për kartonin e De Paul. Spanjollët janë në avantazh natyrisht, pasi kanë një marrëveshje me futbollistin, por negociatat janë ende të hapura. Pas disa sezonesh me fanellën tonë dhe në moshën 27-vjeçare, është e drejtë që të lejojmë De Paul të vijojë karrierën në një klub më të madh, ku të luajë për objektiva madhorë”, u shpreh Marino.
Kjo deklaratë e drejtorit sportive të friulianëve mund të ketë qenë më shumë si një formë presioni për klubin spanjoll, megjithatë Maldini mund të përfitojë nga rasti për t’u futur në mes dhe për të provuar t’i ndryshojë destinacionin fantazistit argjentinas.
