Marseille përforcoi ofensivën me Ruslan Malinovskyi. Drejtuesit e klubit francez gjetën gjuhën e përbashkët me Atalantën për huazimin me detyrim blerjeje për 10 milionë euro (nëse Marseille nuk bie nga kategoria), shumë që shkon në 13 nëse arrihen disa objektiva si sigurimi i një bilete europiane.
29-vjeçari debutoi me ekipin e ri në triumfin 0-2 në transfertë përballë Troyes. Malinovskyi u fut në fushë nga trajneri Igor Tudor në minutën e 67’ dhe u ndëshkua me karton të verdhë vetëm 25 sekonda më vonë.
Mesfushori me tipare sulmuese, vendosi edhe një rekord tjetër, duke u kthyer në futbollistin e parë ukrainas që luan në Ligue 1 me Marseille dhe i teti që luan në kampionatin francez të futbollit.
“Jam i lumtur që mora menjëherë minutat e para me Marseille. Më duhet të punoj shumë, më vjen keq për kartonin. Nuk ishte fare faull, por gjithçka është në rregull”, u shpreh Malinovskyi.
