Benjamin Hubner është tërhequr nga futbolli. 33-vjeçari gjerman, i cili mbante shiritin e kapitenit te Hoffenheimi, është përballur me dëmtime të shumta në tri vitet e fundit aq sa ka vendosur t’i japë fund pasionit të tij.
Hubner luante si qendërmbrojtës, por kur skuadra kishte nevojë aktivizohej edhe si mbrojtës i majtë e si “shkatërrues”. Problemet fizike e kanë lodhur lojtarin shtatlartë, i cili e ka mbyllur aventurën si futbollist profesionist.
https://twitter.com/i/status/1600120624348905473
“Ky është fundi i rrugëtimit tënd. Të jesh krenar për karrierën e mrekullueshme, do të jemi gjithmonë pranë teje, Benni”, lexohet në komunikatën përshëndetëse të klubit gjerman, pjesë e të cilëve Hubner ishte prej verës së vitit 2016.
Në 2.5 vitet e fundit, mbrojtësi zbriti vetëm shtatë herë në fushën e blertë! Në sezonin 2017/2018 ai dhe shokët e tij shijuan aktivizimin në grupet e Champions League, turne ku Hoffenheim mori pjesë për herë të parë në histori.