Nuk luan që prej 27 nëntorit të 2018-ës dhe pikëpyetjet mbi të ardhmen e shqetësojnë sulmuesin e Bayern Munich, Arjen Robben. Holandezi 35-vjeçar pati deklaruar se do të largohej nga kampionët e Gjermanisë në fund të këtij sezoni dhe vendimi i tij u shoqërua me spekulimet se do të vijonte në një tjetër skuadër por mesa duket dëmtimi misterioz i sulmuesit ka ndalur vrullin e tij sportiv.
“Është shumë deprimuese një situatë e tillë. Kam provuar gjithçka deri më tani, por asgjë nuk po funksionon. Problemi është se nuk e dimë cili është problemi. Jam bërë gati dy herë për t’iu rikthyer fushës gjatë këtij harku kohor, por sërish nuk ia kam dale”, tha Robben për gjermanen Bild.
Ndeshja e fundit ku Robben ishte prezent, daton që në 27 nëntorin e shkuar me një performancë brilante të 35-vjeçarit, që realizoi një dygolësh në fitoren 5-1 ndaj Benficas në Champions, por mesa duket tashmë problemet e akumuluara përgjatë viteve në karrierë janë rikthyer.
