Në kampionat nuk fiton prej tre javësh, por Bayerni i Mynihut vijon të bëjë mirë detyrat në Ligën e Kampionëve, kur pas Interit, mposhti po me rezultatin 2-0 edhe Barcelonën mbrëmjen e djeshme në “Allianz Arena”.
Bavarezët vuajtën disi në fillim të ndeshjes, por më pas reaguan mirë dhe morën tre pikët që i mbajnë në krye të renditjes, megjithatë lajmi i keq është dëmtimi i mbrojtësit francez Lucas Hernandez.
Ky i fundit shënoi golin e parë ndaj Barcelonës dhe qëndroi në fushë deri në fund, por më pas raportoi një dëmtim muskulor dhe pas ekzaminimeve mjekësore, mjekët e Bayernit njoftuan se do të duhet të qëndrojë pushim rreth 6 javë.
Thënë ndryshe, Hernandez mund të luajë vetëm 2-3 ndeshje para se të nisë Kupa e Botës Katar 2022, ku pritet të marrë pjesë me Francën e tij.
Të dëmtuar nga ndeshja me Barcelonën dolën edhe Benjamin Pavard, që u zëvendësua në minutën e 21-të dhe Dayot Upamecano, megjithatë gjendja e tyre nuk duket shqetësuese dhe pas dy apo tri ditësh pushim, do t’i rikthehen normalitetit.
