Unioni ka arritur që të marrë një fitore të madhe në derbin e Berlinit, duke mundur me rezultatin 1-4 Hertha. Në “Olimpiastadion” në një atmosferë fantastike dhe në kushte perfekte për të zhvilluar një ndeshje futbolli, “bardhekuqtë” ishin dominues absolut, duke këmbëngulur gjatë gjithë pjesës së parë, megjithatë pavarësisht rasteve të shumta i vetmi që gëzoi në pjesën e parë ishte Haraguchi.
Në pjesën e dytë vendasit ishin disi më kërkues dhe u shpërblyen, teksa gjetën barazimin falë një autogoli të Baumgartl. Festa e Hertha zgjati më pak se tre minuta, pasi Promel arriti që të rikthente sërish epërsinë për skuadrën e Union.
Në vazhdim Becker dhe Michel arritën që të shënonin dhe dy herë, duke kristalizuar rezultatin përfundimtar 1-4 e duke u afruar me zonën e Conference League. Në anën tjetër Hertha mbetet në vendin e 17-të, aktualisht në zonën e rënies e deri në fund do të luftojë për të qëndruar në elitën e futbollit gjerman.