Abissnet Superiore

Derbi i kryeqytetit, Dinamo rikthehet në “Selman Stërmasi”

Dinamo do të rikthehet të luajë në “Selman Stërmasi” ndaj Tiranës, por në rolin e skuadrës pritëse. Dy skuadrat e kryeqytetit do të përballen për raundin e 35-të të Abissnet Superiore, ndërsa kjo do të jetë hera e parë që “Nëndetësja Blu” luan në “Selman Stërmasi” gjatë këtij edicioni ose thënë ndryshe që nga rikthimi në elitën e futbollit shqiptar.

Deri në këto momente Dinamo i ka zhvilluar pjesën më të madhe të takimeve si pritëse në “Elbasan Arena”, kjo edhe për faktin se stadiumi i klubit të Tiranës ka qenë në rikonstruksion e sipër në një pjesë të madhe të sezonit, duke bërë që edhe “bardheblutë” t’i zhvillonin një pjesë të mirë të ndeshjeve larg shtëpisë së tyre.

Dy skuadrat e kryeqytetit vijnë në këtë derbi të fundit mes tyre në këtë edicion, por i fundit në kampionat edhe për sezonin tjetër, pasi në ndryshim nga Tirana që siguroi para dy javësh titullin kampion, Dinamo është zyrtarisht i rënë nga kategoria.

Derbi Dinamo-Tirana do të luhet këtë të shtunë dhe sfida do të nisë në orën 17:00, teksa duke ditur që asnjëra prej dy skuadrave nuk ka tashmë një objektiv për të kërkuar tre pikët, nga të dyja pritet të luhet vetëm për të respektuar kampionatin.

 

 

Eventet Sportive në SuperSport

Të Fundit

EVENTET NË SUPERSPORT

To Top
Evolve Web Agency Evolve Web Agency