Nga Glendi Tafaj
Të gjitha takimet e raundit të 33-të në Kategorinë Superiore do të luhen të dielën në orën 16:30, ky ishte vendimi i Federatës Shqiptare të futbollit kur kanë mbetur edhe 4 ndeshje nga fundi me kërkesën e klubeve. Një urdhër i institucionit që drejton futbollin me qëllim për të shmangur çdo kompromis të mundshëm duke qënë se po luftohet për pozicionet europiane dhe qëndrimin në Superiore.
Logjika e ndjekur është korrekte, por të dielën kalendari rezervon një takim “vitrinë” për futbollin tonë, derbi i madh i kryeqytetit mes Partizanit e Tiranës është një kampionat më vete, një sfidë unike që është e destinuar të mbetet në përjetësi si dueli më i rëndësishëm në Shqipëri.
Një derbi kërkon gjithnjë vëmëndje të veçantë, pa asnjë mungesë respekti ndaj interesave të skuadrave të tjera, por një duel i tillë meriton të zhvillohet veçmas, nën dritën e prozhektorëve për t’i shtuar madhështinë një supersfide të këtij niveli. Partizani-Tirana nuk ka qënë asnjëherë një takim kompromisesh, madje pak vite më parë bardheblutë thuajse pa objektiva i hoqën nga duart titullin kampion demave, e thënë kjo për të kuptuar se arsyetimi i shmangjes së çfarëdo marrëveshjeje nuk qëndron kur luhet derbi. Ky derbi i fundit sezonal, duhet të shkëputet nga çdo takim tjetër i Superiores, sepse jo vetëm që meriton të luhet veçmas, por edhe pse eklipson çdo ndeshje tjetër.