Në Itali vijon diskutimi në lidhje me mundësinë e hapjes graduale të stadiumeve për publikun, ndonëse vendimi më i fundit i Komisionit Shkencor Teknik ka qenë që impiantet të vijojnë të jenë të mbyllur deri në fund të muajit shtator.
Ministri italian i sporteve Vincenzo Spadafora u shpreh optimist se në fund të shtatorit do të ketë një tjetër rivlerësim të situatës dhe mund të nisë hapja graduale e stadiumeve, ndërsa në të njëjtën linjë ishte edhe nën sekretarja e Ministrisë së Shëndetësisë Sandra Zampa.
“Momentalisht jemi përqendruar të monitorojmë situatën pas hapjes së shkollave dhe nëse do të jemi me numra të pranueshëm, në tetor do të marrim në konsideratë hapjen e pjesshme të stadiumeve. DO të ishte mirë që në derbin e 17 tetorit mes Interit e Milanit, të kishte edhe publik. Gjithsesi duhet të kuptoni se me hapjen e stadiumeve për publikun, do të rritet ndjeshëm edhe numri i udhëtarëve në transportin publik, ndaj jemi të rezervuar për të bërë hapa përpara”, u shpreh Zampa.