Shqipëria U-21 është mposhtur me rezultatin 0-2 në miqësoren e luajtur në ‘Elbasan Arena’, ndaj Bosnjës dhe Hercegovinës. Kuqezinjtë e drejtuar nga Alban Bushi pësuan golin e parë që në minutën e 11’, pas goditjes së Dujakoviç, ndërsa Kuzmanoviç dyfishoi shifrat në të 82-tën.
Për skuadrën tonë Shpresa debutuan shumë futbollistë, si Selahi, Shaba, etj, por pa arritur të ndryshojnë gjë në fushën e lojës. Skuadra e Bushit tregoi shumë dëshirë dhe grintë, por pak saktësi në pasimin e fundit, duke mos arritur të jetë e rrezikshme në zonën e boshnjakëve.
Nga ana tjetër, miqtë u mbrojtën me kujdes dhe arrinin të dilnin shumë mirë me kundërsulme, duke shënuar dy herë dhe duke krijuar disa mundësi të tjera të mira, por që portieri Selmani arriti t’i neutralizojë.
Për kuqezinjtë 21-vjeçarë ka edhe dy ndeshje të tjera miqësore në program në muajin Qershor, ndërsa rezultati është shndërruar në makth për ta, pasi nuk fitojnë prej disa takimesh.
