Transferimi i Gaetano Castrovillit te Bournemouth dështon në mënyrë të befasishme. Mesfushori italian nuk ia doli të kalojë me sukses testet mjekësore dhe do të rikthehet sërish në Firence, për të vijuar kontratën e tij me Fiorentinën.
Klubi vjollcë kishte arritur marrëveshjen me anglezët për shifrën e 14 milionë eurove dhe Castrovilli udhëtoi drejt Anglisë për të kryer testet mjekësore gjatë të premtes.
Megjithatë në komunikatën e shpërndarë nga Fiorentina sqarohet se ai dështoi të kalojë testet mjekësore, për shkak të problemeve në gju, që e mbajtën shumë muaj larg fushave dhe do të kthehet në bazë, për të rinisur stërvitjen nën urdhrat e trajnerit Italiano.
Lexo edhe:
- Manchester City prezanton mbrojtësin më të shtrenjtë në histori
- Falcao rrezikon burgun, jep dorëheqjen nga Santosi
- Napoli gjen pasuesin e Kim, gati firma me mbrojtësin brazilian
- Atalanta fiton garën me Interin, gati firma me sulmuesin italian
Gaetano Castrovilli ka kontratë me Fiorentinën deri në verën e 2024-ës dhe refuzimi i futbollistit për të zgjatur bashkëpunimin, detyroi klubin vjollcë ta nxjerrë në shitje që këtë verë, për të mos e humbur me parametra zero.
Megjithatë dështimi i transferimit për shkak të problemeve fizike, pritet të ndryshojë skenarët, me Castrovillin që mund të marrë në konsideratë ofertën e Fiorentinës për rinovim me pagë më të ulët.
