Intervista e trajnerit të Kastriotit, Bledar Devolli, dhënë për Supersport pas ndeshjes që krutanët fituan 2-0 ndaj Flamurtarit, në stadiumin “Redi Maloku” të Fushë Krujës.
Ju fituat dhe Tirana humbi, a mund të themi se ishte një javë pozitive për Kastriotin?
Pozitive është që fituam ndeshjen tonë dhe kjo më gëzon shumë. Jam i lumtur edhe për lojën, pasi kemi bërë një nga ndeshjet më të mira, duke shënuar dy gola dhe duke mbajtur larg kundërshtarin. Humbja e Tiranës na e shtoi edhe më shumë gëzimin, pasi tashmë e kemi fatin në duart tona.
Sa jeni gati për t’u përballur me Tiranën në ndeshjen e jetës?
Që nga dita e parë kur kam ardhur, kemi bërë një kampion at të jashtëzakonshëm, pasi kemi marrë rezultate, por kemi zhvilluar edhe lojëra të bukura. Çunat janë ngritur shumë në nivelin e paraqitjes së tyre, ndaj besoj se jemi gati për ndeshjen ndaj Tiranës.
Partizani u shpall kampion. Sa e meritoi këtë titull?
E kam thënë gjithmonë që Partizani ka kryesuar me meritë dhe e ka merituar tërësisht titullin kampion. Kanë një grup shumë të fortë dhe kanë bërë paraqitje bindëse nga java në javë, ndaj dua t’i uroj për titullin.