Roma do të ketë dy ndeshje radhazi në ‘Olympico’, ku do të presë fillimisht Crotonen nesër dhe më pas Bolognën, të shtunën. Trajneri i verdhekuqve, Eusebio Di Francesco, në konferencën e sotme për shtyp u dërgoi një mesazh të qartë futbollistëve të tij, duke u thënë se nuk pranon asnjë rezultat tjetër, përveç fitores në këto dy takime.
“Crotone është një skuadër që mund të bëjë keq. Edhe vitin e kaluar, bëri një fazë të dytë të mrekullueshme dhe ia doli t’i shpëtojë rënies. Nga ana tjetër, edhe Bologna i ka bërë një nisje mjaft të mirë sezonit dhe është një skuadër eksperte tashmë në Serinë A, ndaj nëse duam që të jemi aty mes pretendentëve për të ngritur titullin në maj, duhet që në këto takime të mos e diskutojmë 3-pikëshin”, tha Di Francesco.
Trajneri i verdhekuqve zbuloi disa prej emrave që do të zbresin në fushë nesër ndaj Catanias, ndërsa tha se është gati për të debutuar edhe mbrojtësi holandez, i ardhur këtë verë në Romë, Karsdorp.
“Nesër është momenti që të debutojë në Serinë A, Rick Karsdorp, ndërsa në fushë do të jenë edhe Kolarov e Dzeko. Patrick Schick është rikuperuar, por duam ta përfshijmë gradualisht, për të mos rrezikuar një tjetër dëmtim. Ndoshta mund të luajë disa minuta në pjesën e dytë”, tha Di Francesco.
