Një tjetër kampion i madh do t’i thotë lamtumirë futbollit të luajtur. Didier Droga, në moshën 39-vjeçare, ka vendosur “të varë këpucët në gozhdë”. Sulmuesi, që për momentin aktivizohet me Phoenix Rising, në Serinë B amerikane, ka konfirmuar tërheqjen e tij në fund të sezonit. Ai tha se vjen një moment kur duhet të thuash mjaft. Drogba shtoi se ka nevojë të ketë më shumë kohë në dispozicion për projekte të tjera.
Sulmuesi nga Bregu i Fildishtë e nisi karrierën si profesionist në kampionatin francez me Le Mans në vitin 1998, më pas u transferua te Guingamp dhe Olimpique Marseille. Në “Velodrome” shkëlqeu në sezonin 2003-2004, për t’u transferuar më pas te Chelsea në Premier League, ku u aktivizua për 8 sezone radhazi dhe arriti kulmin në karrierën e tij duke fituar Championsin pas shumë trofeve të tjerë. Drogba ka luajtur gjithashtu me Shangai Shenhua, Glatasaray-n, sërish me Chelsea-n dhe me Montreal Impact.
