Pas largimit të befasishëm të Francesco Morieros dhe Fabrizio Miccolit nga pankina e Dinamos mbrëmjen e djeshme, klubi kryeqytetas nuk ka humbur aspak kohë dhe ka prezantuar menjëherë trajnerin e ri.
Bëhet fjalë për ish futbollistin e bluve, Olsi Uku, i cili ka qenë edhe ndihmës i Fabrizio Cammaratës, gjatë kohës që ky i fundit drejtoi Dinamon. Uku njeh mjaft mirë ambientin dhe futbollistët e bluve, ndaj u pa si njeriu i duhur për të drejtuar skuadrën në këtë moment.
Në CV-në e tij si trajner ka edhe një eksperiencë si ndihmës i Nevil Dedes në stolin e Tiranës, ndërsa tani do të provojë të rikthejë Dinamon në elitën e futbollit shqiptar, aty ku blutë mungojnë prej vitesh.
Francesco Moriero dhe Fabrizio Miccoli u larguan në mënyrë të befasishme dje në mbrëmje, nëpërmjet një statusi në rrjetet sociale, ndërsa menjëherë pas tyre reagoi presidenti Pontrelli, i cili theksoi se do t’i besojë një trajneri shqiptar.
