Klubi i Dinamos vazhdon përforcimet në merkato, teksa sot ka prezantuar edhe afrimin e gardianit 29-vjeçar Klajdi Kuka, i cili ka qenë pjesë e disa skuadrave në Kategorinë e Parë, por ka provuar edhe Superioren me klubin e Kastriotit.
Blutë e kryeqytetit kanë synime të mëdha për t’u rikthyer menjëherë në Kategorinë Superiore dhe kanë njoftuar se pas Kukës, pritet edhe afrimi i dy futbollistëve të tjerë, nga skuadra të kampionatit italian.
Ky ishte postimi i klubit në rrjetet sociale:
Zyrtare/ Klajdi Kuka është lojtari më i ri i Dinamos.
Portieri 29-vjeçar me mjaft eksperiencë, ka gjetur gjuhën e përbashkët me drejtuesit e klubit, për të qënë pjesë e 18 herë kampionëve te vendit në vazhdim. Më herët, Kuka ka qënë pjesë e Tomorit, Tërbunit e Kastriotit në superligë, ndërsa ka provuar të luajë edhe në ligat gjermane. Merkato vazhdon dhe klubi po punon për të sjellë në kryeqytet edhe dy yje të rinj nga klube të rëndësishme të Serisë A.
