Ajo që ka raportuar Supersport pak ditë më parë se Bruno Dita do ta vazhdojë karrierën te Shkëndija e Tetovës dhe se ndaj Partizanit do të luante sfidën e fundit me fanellën e Skënderbeut është konfirmuar edhe nga vetë futbollisti, që me një postim në rrjetet sociale, menjëherë pas sfidës ndaj të kuqëve ka konfirmuar largimin e tij nga korçarët duke falenderuar presidentin, shokët e skuadrës dhe trajnerët që ka patur në këto 3 vite.
“Gjithmonë ndarja është e vështirë, por çdo fillim e ka një fund. Këto 3 vite aty janë momentet më të bukura të karrierës sime deri tani dhe unë nuk do i harroj kurrë çfarë kaluam së bashku. Dua të falënderoj në radhë të parë të gjithë shokët e skuadrës, presidentin e ekipit Ardjan Takaj, tifozerinë “Ujqërit e Dëborës”, që në çdo moment, të mire apo të keq, më kanë përkrahur vazhdimisht.
Një falënderim të veçantë kam për trajnerët e mi, Ilir Daja dhe Orges Shehi, që së bashku me ndihmësit e tyre më mësuan kaq shumë këto vite dhe më rriten profesionalisht si futbollist.Skënderbeu dhe Korça me njerëzit e saj të mrekullueshëm, do të jenë të gdhendura me shkronja të arta në zemrën time e do kenë një vend të veçante aty.
Shpresoj që rrugët tona të bashkohen përsëri një ditë, ja u dëgjofsha të mirën, jo vetëm në Shqipëri por edhe në Evropë shumë shpejt. Suksese SKENDERBE“, shkruan Dita.
