Pilotët e Mercedesit dominojnë provat zyrtare të Çmimit të Madh të 70-vjetorit të Formula 1. Kohën më të mirë e regjistroi Valtteri Bottas, i cili e përshkoi pistën e Silverstone për 1 minutë, 25 sekonda e 125 të mijtat, duke fituar kështu të drejtën për t’u nisur nga “pole position”. Me vetëm 63 të mijtat më shumë, koha e dytë më e mirë ishte e Lewis Hamilton, ndërsa në vijën e dytë do të rreshtohen Nico Hulkenberg me Racing Point dhe Max Verstappen me Red Bull.
Ferrari duhet të kënaqet me vendin e tetë të Charles Leclerc, që niset nga vija e katërt, ndërsa Sebastian Vettel u rendit i 12-ti, sa i përket kohës. Gjithsesi, falë penalitetit me 3 pozicione që mori Ocon, pasi u bë pengesë për Russell, gjermani i “Kokëkuqes” do të niset nga pozicioni i 11-të.