Max Verstappen triumfoi për herë të nëntë në këtë sezon të Formula 1 me holandezin që edhe pse u nis nga vendi i 14-të për shkak të modifikimeve në motor, ia doli ta kalonte me humë thjeshtësi vijën e finishit si lideri në pistën e SPA Francorchamps në Belgjikë.
RedBull dhe Verstappen treguan një formë të shkëlqyer pas pushimeve duke lënë shumë prapa edhe Ferrarin e Leclerc e Sainz (që gjithsesi u ngjit në podium si vendi i tretë), e megjithatë Kampioni në Fuqi i Botës thekson se do të jetë e vështirë që të dominojnë në këtë formë edhe në fundjavat në vijim duke nisur nga ajo e rradhës në Zandvoort të Holandës.
“Nëse merr në konsideratë të gjithë fundjavën, atëherë është e dukshme që makina ka qenë e mrekulleshme. Nuk mund të them se ishte e pritshme, por është bukur kur merr të tilla surpriza dhe e shijova garën e Belgjikës këtë sezon. Edhe pse e pres që jo çdo fundjavë do të jetë kështu, e rëndësishme është të marrim pikë në çdo garë.
Xhiro më e vështirë në Belgjikë, ishte ajo e para sepse kishte shumë makina dhe rrëmujë para dhe nuk doja të përfshihesha. E kaluam mirë atë pjesë dhe pas Safety Car, çdo gjë shkoi mirë. Isha duke parakaluar thuajse në çdo xhiro dhe sapo u ngjita në vendin e tretë, e kuptova se mund ta fitonim garën”, u shpreh Verstappen.
