Gianluigi Donnarumma vijon të ngurrojë për të hedhur firmën mbi kontratën e re dhe gjasat janë që në verë të largohet nga Milani, ndaj kuqezinjtë kanë nisur menjëherë lëvizjet për të mos u zënë të papërgatitur.
Kështu siç raportojnë mediat spanjolle, dyshja Maldini-Massara kanë kontaktuar me portierin 31-vjeçar brazilian Neto, i cili aktualisht është zëvendësuesi i parë i gjermanit Ter Stegen te klubi i Barcelonës.
Neto në të shkuarën ka qenë pjesë e Fiorentinës dhe Juventusit në Serinë A, por edhe të Valencias në Spanjë, ku ka fituar eksperiencë të mjaftueshme dhe mirëpret një aventurë me fanellën kuqezi të Milanit.
Mediat spanjolle raportojnë se Milani do të provojë ta marrë portierin Brazilian në huazim gjatë verës, duke ruajtur të drejtën e blerjes për një shifër prej 10-15 milionë eurosh, që mund të joshë jo pak Barcelonën.
Kontrata e Donnarummës me Milanin përfundon në fund të sezonit dhe deri tani nuk ka një marrëveshje për rinovim, pasi pretendimet e menaxherit të tij, Mino Raiola, janë shumë më të larta sesa mund të ofrojnë kuqezinjtë.