Pas humbjes befasuese në transfertën kryeqytetase ndaj Union Berlinit, në fillim të muajit, Borussia e Dortmundit u rikthye te fitorja, duke mposhtur bindshëm 4-0 Bayer Leverkusenin, në sfidën e zhvilluar në “Signal Iduna park”.
Verdhezinjtë zhbllokuan sfidën në pjesën e parë, me anë të sulmuesit spanjoll Paco Alcacer, ndërsa në 45-minutëshin e dytë shënuan dy herë kapiteni Marco Reus dhe një herë Guerreiro, duke vulosur suksesin bindës.
Fitoi 2-1 edhe Augsburgu në sfidën përballë Eintracht Frankfurt, ndërsa Borussia Munchengladbach doli me 3 pikë nga transferta ndaj Kolnit, falë triumfit me rezultatin minimal 0-1.
Momentalisht Borussia Dortmund merr kreun e renditjes me 9 pikë, po aq sa ka edhe Leipzig, që në orën 18:30 do të presë Bayernin e Mynihut, në një sfidë që premton spektakël.