Trajneri i Bylisit Veljko Dovedan pranoi se skuadra e tij vuajti jo pak ndaj Flamurtarit, teksa në intervistën për Supersport theksoi se është i kënaqur me rezultatin, pasi vuajti mungesën e shumë futbollistëve sot.
Sa ju vjen keq që nuk fitoni një ndeshje të cilën e kishit nën kontroll?
Çfarë mund të them kur pësojmë gola nga hiçi. Më vjen shumë keq dhe nuk di çfarë të them më shumë për ndeshjen e sotme.
E kishit të vështirë të ndërtonit formacionin, duke parë mungesat e shumta?
Ka qenë shumë e vështirë, pasi edhe kur ktheja kokën nga pankina, nuk dija kë të aktivizoja. Mungesat bënë të vetën, pasi nuk kisha mundësi të freskoja skuadrën.
Ju ngushëllon fakti që në Vlorë kanë ngecur edhe skuadra të tjera si Partizani, Laçi, Tirana, etj.?
Na ka kushtuar shumë mungesa e lojtarëve të dëmtuar dhe atyre të pezulluar, por kështu si shkoi loja, jam i kënaqur me një pikë, pasi edhe mund të kishim humbur. U treguam të papërgjegjshëm në fushën e lojës dhe të paktën nuk humbëm.
A ishin 10 minutat e fundit, më të këqijat që kur drejtoni Bylisin?
Normalisht edhe unë jam në një linjë me ju deri diku, pasi po ta shohësh me vëmendje, nuk kemi bërë 2-3 pasime radhazi të sakta, ndaj ishte një 10-minutësh për t’u harruar.
A është ky momenti që trajneri të fillojë të mendojë për merkaton?
Normalisht më duhen minimalisht 3 lojtarë të rinj në merkaton e janarit dhe pastaj të vazhdojmë punën, sepse na pret një sezon i gjatë dhe shumë më i vështirë.
Ku do të donit të përforcoheshit?
Në çdo linjë të fushës, në çdo pozicion do të ishte mirë të përforcoheshim, por me kushtin që të vijnë lojtarë që bëjnë diferencën dhe rritin kualitetin e skuadrës.
