Bënte pjesë te ato ndeshje që duheshin fituar patjetër, për të shpresuar për një vend në zonën Champions, por Atalanta nuk ia doli të shkojë më shumë se një barazim pa gola në sfidën në shtëpi, përballë Empolit.
Zikaltrit dominuan tërësisht takimin, duke mbyllur Empolin për thuajse të 90 minutat në gjysmëfushë, por gjetën përballë një portier si Dragowski, që sot kishte “veshur kostumin e Superman-it”, duke ndaluar çdo tentativë drejt portës së tij.
Dy pikë të humbura për Atalantën, që mbetet në vendin e gjashtë, tashmë me 53 pikë, por me një kalendar “të frikshëm” në transfertat e mbetura deri në fund të sezonit, çka e komplikon edhe më shumë një vend në zonën Champions.
Nga ana tjetër, Empoli merr një pikë të çmuar në luftën për mbijetesë, pasi do të kërkojë maksimumin javën e ardhshme, në përballjen direkte me Spalin, në shtëpi. Vlen të theksohet se në fushë ishin edhe dy futbollistët e Kombëtares Shqiptare, Federik Veseli dhe Berat Gjimshiti, ndërsa Etrit Berisha e ndoqi takimin nga stoli.
