Xhuliano Skuka u bë futbollisti më i shtrenjtë i shitur nga Superiorja, kur francezët e Metz vendosën të paguajnë 1.4 milionë euro për kartonin e tij në arkat e Partizanit.
Sulmuesi 24-vjeçar a nisur tashmë aventurën në Francë me Metz dhe ka marrë pak minuta në dy ndeshjet e para, ndërsa drejtori sportiv i klubit francez ka komentuar blerjen e tij për mediat vendase.
Pierre Dreossi u shpreh se të gjithë e dinë që Skuka nuk është ende gati, por është një bast i fortë i drejtuesve të Metz, pasi ka cilësitë e duhura për t’u ngritur në nivelet që të gjithë presin.
“Në dimër nuk është e lehtë që të gjesh një sulmues për të përforcuar ekipin, por ne vendosëm të marrim Skukën. Që të jemi të qartë, ai nuk është ende gati për të luajtur në Francë, por ne e dinim këtë që në fillim. Futbolli në Shqipëri, me atë këtu në Francë ndryshon shumë dhe Skuka është një bast për ne, por kemi shumë besim te aftësitë e tij. Është një sulmues me grintë dhe dëshirë për t’u përmirësuar, ndaj shpresojmë që të rritet sa më shpejt e të arrijë në nivelet që ne presim. Ka gjithçka që i duhet për të bërë mirë, pasi e njeh qytetin dhe flet mirë frëngjisht”, deklaroi drejtori sportiv i Metz.
