Pas startit me humbje në transfertën ndaj Feronikelit, Drenica ka gjetur fitoren e parë në kampionat, pikërisht në javën e dytë, në ndeshjen ndaj Llapit në shtëpi.
Sfida e parë e javës së dytë përfundoi me rezultatin 3-0 për Drenicën, që arriti të zgjidhë fatin e takimit vetëm në pjesën e dytë, kur edhe shënoi të tre golat.
Harmon zhbllokoi sfidën në minutën e 52-të, ndërsa Mziu arriti të dyfishojë shifrat 10 minuta më vonë. Golin e sigurisë për Drenicën e shënoi Elshani në minutën e 73-të, ndërsa Llapi nuk arriti të tregojë asgjë në këtë takim.
Java e dytë e IPKO Superligës së Kosovës do të vijojë nesër me dy takime dhe të dielën me dy ndeshje të tjera, ndërsa sfida mes Prishtinës dhe Dukagjinit është shtyrë për më 25 shtator, pasi FFK-ja duhet të mirëmbajë terrenin e stadiumit “Fadil Vokrri”.
