Drenica rikthehet te fitorja në Superligën e Kosovës pas humbjes 2-5 të javës së kaluar, teksa Trepça ’89 dhe Ferizaj ndanë nga një pikë mes tyre. Kuqezinjtë nga Skënderaj fituan 1-2 në Klinë përballë Dukagjinit, që mbetet në kërkim të fitores së parë sezonale.
Drenica siguroi tre pikët falë golave të Bintsouka Koxy (13’) dhe Altin Vojvoda (39’) në pjesën e parë. Vendasit shkurtuan rezultatin nëpërmjet një penalltie të Otto John (50′), por vetëm kaq.
Dukagjini mbetet në vend të fundit me vetëm dy pikë të grumbulluara në shtatë javë kampionat, ndërkohë që Drenica është ngjitur në vend të pestë me tetë pikë.
Nuk ka fitues në Mitrovicë, aty ku Trepça ’89 dhe Ferizaj e mbyllën në barazim 1-1 duelin e luftuar mes tyre. Skuadra udhëtuese kaloi e para në avantazh dhjetë minuta përpara fundit të takimit.
Drilon Sadiku zhbllokoi takimin, por Trepça ’89 evitoi humbjen falë rrjetës së Armend Gashit në minutat shtesë. Vendi i shtatë dhe po kaq pikë për Ferizajn, teksa skuadra nga Mitrovica renditet e treta nga fundi me një pikë më pak.
Superliga e Kosovës
Java e shtatë
Dukagjini-Drenica 1-2
Trepça ’89-Ferizaj 1-1
