Prishtina në krizë të thellë rezultatesh në Superligën e Kosovës. Ekipi kryeqytetas u mposht edhe nga Drenica me rezultat minimal, duke e çuar në 3 numrin e humbjeve radhazi, çka reflektohet edhe me klasifikimin në pjesën e poshtme të tabelës. Golin e vetëm të këtij takimi të zhvilluar në Skënderaj e realizoi Egzon Fazliu në minutën e 60-të. Një ditë me shumë fat për Fazliun, që u shndërrua heroi i Drenicës, edhe pse e kishte nisur takimin në stolin e rezervave.
Drita e Gjilanit, ndërkohë, fitoi me përmbysje 1-2 në fushën e Lllapit, për suksesin e tretë radhazi në Superligë. Valmir Veliu e kaloi Llapin në epërsi që në minutën e tetë, por “intelektualët” u kundërpërgjigjën me Almir Ajzerajn që barazoi në minutën e 57-të, para se Ahmed Januzi të shënonte autogol 20 minuta para fundit.
Llapi zhvilloi një lojë shumë të mirë dhe krijoi rate, por nuk i mjaftoi ta shmangë humbjen e gjashtë në nëntë ndeshje këtë sezon.
