Me ardhjen e Maurizio Sarrit tek Chelsea, duket se çdo gjë po shkon më së miri. Lojtarët e kanë harruar periudhën e errët që po kalonin kur në drejtim ishte Antonio Conte. Mirëpo është një futbollist, i cili, me ardhjen e italianit, ka luajtur vetëm një ndeshje në këtë fillim sezoni. Bëhet fjalë për Danny Drinkwater, që të vetmen paraqitje e ka bërë në Community Shield, ku Chelsea humbi kundër Manchester City. E nëse shumë lojtarë do të ishin të acaruar nga kjo situatë, duket se për Drinkwater nuk është kështu. Aktualisht, 28-vjeçari paguhet 100.000 paundë në javë dhe kjo është arsyeja kryesore që ai nuk do të ndryshojë fanellë, me gjithë interesimet e West Hamit apo edhe ish-ekipit të tij, Leicester City.
Mesfushori u ble në fund të merkatos së vitit 2017 për shifrën e 40 milionë eurove, por dëmtimi në sezonin e kaluar e besimi i paktë nga tranjeri i ri këtë sezon, kanë bërë që ai të ketë vetëm 23 ndeshje me “Blutë” e Londrës. Çdo skuadër, e cila do të dëshirojë të bëjë një ofertë të mirë për Drinkwater gjatë merkatos së ardhshme, do të blinte pa dyshim një futbollist cilësor. Por, po ky lojtar, duket se nuk ka ndërmend të heqë dorë nga rroga e tij prej 6 milionë eurosh në vit, duke e vënë pagën edhe përpara karrierës së tij.