Drita dhe Prishtina vijojnë duelin në distancë për titullin kampion në Vala Superligën e Kosovës edhe pas javës së 29-të. Në Gjilan Drita mposhti 3-1 me përmbysje Feronikelin e Sulejman Starovës duke ruajtur avantazhin prej 3 pikësh ndaj Prishtinës së Mirel Josës që në Pejë mposhti 3-2 Llapi në një tjetër sfidë që dhuroi shumë emocione. Në një atmosferë fantastike në praninë e rreth 4500 tifozëve, Drita e Bekim Isufit edhe pse e pa veten në disavantazh 0-1 pas golit të Mendurim Hotit realizoi 3 herë në pjesën e dytë dhe 4 javë para fundit të kampionatit është shumë pranë fitimit të titullit kampion.Bujar Shabani, Fidan Gërbeshi dhe Leutrim Kryeziu ishin autorët e golave për skuadrën gjilanase që falë këtij suksesi u ngjit në kuotën e 59 pikëve, 3 më shumë se Prishtina që gjithashtu nuk e pati të lehtë ndaj Llapit. Në fushën asnjanëse Shahin Haxhiislami në Pejë, skuadra e Josës po kryesonte 3-1 pas vetëm 32 minutash lojë falë dygolëshit të Ahmed Januzit dhe finalizimit të Arbër Hoxhë, ndërkohë që për formacionin nga Podujeva barazoi përkohësisht shifrat Mentor Zhdrella. 2 minuta para fundit Llapi gjeti edhe golin e dytë me Altin Merlakun. Dy barazime pa gola u regjistruan në dy sfidat e tjera të javës së 29-të, me Trepça 89” që zhgënjeu duke ngecur në Mitrovicë përballë Flamurtarit , ndërkohë që nuk prodhoi asnjë fitues dhe asnjë gol as derbi i Dukagjinit mes Vëllaznimit dhe Besës.