Pas humbjes në mesjavë në Therandë përballë Ballkanit kryesues, Drita është rikthyer te suksesi dhe e ka bërë këtë në një tjetër ndeshje direkte, atë përballë Prishtinës në Gjilan, iku arriti të fitojë me rezultatin final 2-1.
Në një terren disi të rënduar edhe për shkak të reshjeve të shiut, Drita gjeti golin e avantazhit që në minutën e tetë me anë të sulmuesit kryesor të saj, Kastiot Rexha, i cili u tregua i saktë para portës dhe mposhti gardianin kryeqytetas, Visar Bekaj.
Në pjesën e dytë ishte sulmuesi i huazuar nga Skënderbeu, Otto John që shënoi golin e barazimit për Prishtinën e Armend Dallkut, por vetëm pak minuta më vonë ishte Astrit Fazlliu që shënoi edhe golin e dytë për vendasit, duke sigluar kështu suksesin.
Humbi edhe skuadra tjetër e qytetit, Gjilani, që u mposht me rezultatin 2-1 nga Llapi, në transfertën e zhvilluar këtë pasdite në Podujevë. Vendasit shënuan dy herë në pjesën e parë, ndërsa Nikac në minutën e 70’ rihapi ndeshjen, por Gjilani nuk pati fuqinë të shënojë sërish dhe të shmangë humbjen.
Me fitoren sot Drita parakalon Gjilanin e Prishtinën dhe ngjitet në vendin e dytë, ndërsa Ballkani ka një mundësi të artë për t’u shkëputur, nëse do të arrijë të marrë maksimumin nga transferta kryeqytetase ndaj Flamurtarit nesër pasdite.