Java e 20-të e IPKO Superligës së Kosovës, e shtrirë në tri ditë, do të nisë sot me dy takime mjaft interesante, Drita-Drenica, Ferizaj – KF Llapi. Sigurisht që vëmendjen kryesore e merr takimi i Gjilanit (13:00), të cilin “Intelektualët” dëshirojnë ta fitojnë me çdo kusht, për të barazuar Ballkanin në krye të renditjes. Skuadra e drejtuar nga Ardian Nuhiu e ka nisur mbarë vitin 2020 me dy fitore radhazi në kampionat, duke u kandiduar si një nga rivalet më të forta për trofenë e kampionit. Edhe statistikat e përplasjeve direkte me Drenicën i japin përparësi Dritës në këtë duel, pasi ekipi nga Skënderaj nuk fiton prej thuajse tre vjetësh me këtë kundërshtar.
Në takimin tjetër të ditës së sotme (13:00), Ferizaj e problemeve të shumta në organizim, synon të marrë fitoren e parë për këtë vit kalendarik, me shpresën për të mbijetuar të IPKO Superligë. Llapi, nga ana tjetër, tashmë jashtë garës për titullin, kërkon një seri rezultatesh pozitive për të synuar pse jo një vend në kupat e Europës.
Të shtunën i vjen radha përplasjes më të rëndësishme të javës, Prishtina-Ballkani, që do të zhvillohet në “Fadil Vokrri” në orën 17:00, ndërsa më herët, në 13:00, janë programuar të zhvillohen Dukagjini-Gjilani dhe Feronikeli – Trepca 89. Takimi i fundit i javës së 20-të, Flamurtari-Vushtrria, do të luhet të dielën, në orën 13:00.
E premte (13:00)
Drita-Drenica
Ferizaj – KF Llapi
E shtunë (13:00)
Dukagjini-Gjilani
Feronikeli – Trepca 89
Prishtina – FC Ballkani (17:00)
E Diel (13:00)
Flamurtari – Vushtrria
