Klubi kampion i Kosovës, Drita ka njoftuar se ka vendosur të ndërpresë bashkëpunimin me 4 prej futbollistëve që ishin pjesë e skuadrës që ngriti lart titullin në sezonin që sapo lamë pas.
Bëhet fjalë për portierin nga Prilepi Darko Tofiloski e mbrojtësin Liridon Leci, të cilëve u ka përfunduar kontrata dhe drejtuesit e klubit të dritës vendosën të mos ua rinovojnë bashkëpunimin.
Gjithashtu edhe futbollistë si Lirim Mema dhe Bunjamin Shabani, të cilët kanë pasur ende edhe një vit kontratë më gjilanasit, kanë zgjidhur me marrëveshje bashkëpunimin, duke qenë se nuk kanë qenë të kënaqur me aktivizimin e paktë.
Nëpërmjet një komunikate në faqen zyrtare në Facebook, klubi i Dritës ka falënderuar të katër futbollistët për kontributin e dhënë me fanellën e skuadrës dhe u ka uruar suksese në të ardhmen.