Pasditen e sotme do të luhen edhe dy ndeshjet e fundit të javës së 10 të IPKO Superligës në Kosovë, ku vëmendja do të jetë në Gjilan, me Dritën që do të presë surprizën e këtij sezoni, Ballkanin.
Vendasit vijnë pas një gjysmë hapi fals në transfertën ndaj Drenicës, ku nuk shkuan më shumë se barazimi 1-1, ndërsa sot do të tentojnë rikthimin te fitorja, për t’iu bashkuar në krye të renditjes skuadrës tjetër të qytetit, Gjilanit.
Nga ana tjetër Ballkani vjen pas 4 fitoresh radhazi, e fundit ndaj Prishtinës dhe i ka befasuar të gjithë në këto javë të para, duke grumbulluar 20 pikë, teksa një sukses sot në Gjilan, do ta ngjiste të vetme në krye, me 23 pikë.
Takimi tjetër që do të luhet pasditen e sotme, do të jetë ai mes Ferizajt dhe Prishtinës, me vendasit që luftojnë për mbijetesë dhe do të ishin të kënaqur po të mund të shkëpusnin qoftë edhe një pikë nga përballja me kryeqytetasit.
Megjithatë këta të fundit, pas 3 fitoreve radhazi nën drejtimin e Armend Dallkut, regjistruan dy rezultate negative si humbja ndaj Ballkanit dhe barazimi ndaj Drenicës, duke mbetur disi mbrapa nga kreu, dhe fitorja në Ferizaj është shndërruar në detyrim.
