Në Superligën e Kosovës u luajtën tri ndeshjet e para të xhiros së 21-të, ku spikati takimi i zhvilluar në kryeqytet Prishtina -Drita, e fituar nga “Intelektualët” 1-2 me përmbysje.
Prishtina është zhytur më shumë në krizë, pasi për të ishte humbja e tretë radhazi në kampionat.
Të parët kaluan në epërsi vendasit me anë të Jalen Blesa (34’), por kundërpërgjigjja e Dritës erdhi shumë shpejt me Besnik Krasniqi, që u tregua i saktë nga pika e bardhë para se të përfundonte pjesa e parë.
Fraksioni i dytë nisi më mirë për miqtë, që shënuan shumë shpejt të dytin me Baftiun, për ta mbrojtur më pas me fanatizëm rezultatin.
Pas kësaj fitore, Drita ndan pozitën e parë me Ballkanin me nga 44 pikë, ndërsa Prishtina mbetet e katërta me 27 pikë.
Me të njëjtin rezultat 1-2 fitoi edhe Gjilani në fushën e Drenicës.
Kelmendi e zhbllokoi takimin që në minutën e dytë, duke i befasuar vendësit, por baraspesha në rezultat u kthye në sekondat e fundit të shtesës së pjesës së parë nga Dervishaj.
Goli i fitores për Gjilanin i shënua nga Zabërgja gjashtë minuta para përfundimit të kohës së rregullt.
Takimi tjetër kësaj të mërkurë mes Malishevës dhe Ferizajt u mbyll pa fitues, 1-1. Të dy golat u shënuan në fundin e pjesës së parë e mbajnë firmën e Mustafës dhe Halilit.
