E mërkurë e pasur me ndeshje në SuperSport, ku nga kampionatet elitare do të transmetohen plot shtatë sfida, katër nga Seria A dhe dy nga Premier League.
Në kampionatin italian, në orën 19:30, zbresin në fushë Milani dhe Napoli, dy ekipe që luftojnë për zonën europiane e që u ndanë në barazim 2-2 në përplasjen e pak ditëve më parë në “San Paolo”. Kuqezinjtë presin në “San Siro” Parmën, ndërsa skuadra e Gattusos viziton Bolognan. Kalendari në javës së 33-të duket më favorizues për “Djallin”, aq më tepër që Parma ka shfaqur rënie të theksuar me katër humbje radhazi dhe një barazim në 5 takimet e fundit. Pioli ka paralajmëruar ndryshime në formacion, me Bonaventurën dhe Leaon gati ta nisin titullar, por edhe Kessie mund të lihet pushim.
Në orën 21:45 do të transmetohen tri takimet të tjera nga Seria A. Juventusi, pas humbjes me Milanin dhe barazimit me Atalantën, rezultate që gjithsesi nuk ia cënuan objektivin, do të udhëtojë për t’u përballur me Sassuolon, skuadër që ka impresionuar me katër fitore radhazi në Serinë A, e fundit 1-2 në “Olimpico” ndaj Lazios. Vendësit, të mbushur me entuziazëm, do të tentojnë deri në fund për një vend në Kupat e Europës, edhe pse duket i vështirë rikuperimi i diferencës me Milanin dhe Napolin. Për këtë arsye, parashikohet një sfidë e vështirë për bardhezinjtë, që duan t’i mbyllin sa më parë llogaritë për titullin.
Lazio, e dorëzuar tashmë në garën për titull, luan në transfertë me Udinesen, që i duhen pikët për mbijetesën, ndërsa me shumë interes pritet Roma-Verona, ku për fat të keq do të mungojë për arsye dëmtimi në mbrojtjen e veronezëve Marash Kumbulla, ndërsa Rrahmani si gjithmonë projektohet titullar.
Ndër dy takimet e Premier League-s i pari është Manchester City – Bournemouth, që do të nisë në orën 19:00. Miqtë shpresojnë të marrin pikë të vlefshme për qëndrimin në elitën e futbollit anglez, por do ta kenë shumë të vështirë përballë Citizens, që duan të ruajnë formën për Championsin si dhe kanë entuziazmin e vendimit të KAS-it, që hodhi poshtë pezullimin e dhënë nga UEFA (ndalimin e pjesëmarrjes së City-t për dy vite në Kupat e Europës).
Në 21:15 për të pasionuarit e futbollit spektakolar anglez vjen Arsenal-Liverpool, një sfidë vitrine që nuk e humb interesin, pavarësisht se “The Reds”, por edhe “Topçinjtë”, i kanë mbyllur llogaritë me sezonin.
E Mërkurë, 15 Korrik
Man. City – Bournemouth 19:00
Milan – Parma 19:30
Bologna – Napoli 19:30
Arsenal – Liverpool 21:15
Sassuolo – Juventus 21:45
Udinese – Lazio 21:45
Roma – Verona 21:45