Rezultatet zhgënjyese të Charles Leclerc në javët e fundit, kombinuar me triumfin e Carlos Sainz në Çmimin e Madh të Silverstone, kanë ndezur ambiciet e pilotit spanjoll për të qenë ai protagonisti numër 1 te Ferrari. Diçka e tillë u vu re edhe në garën Sprint të së shtunës në Austri, teksa Leclerc iu desh shumë mund për t’i marrë vendin e dytë shokut të skuadrës.
Nga dueli brenda Ferrarit, ai që përfitoi ishte Max Verstappen që fitoi me lehtësi garën e shkurtër. Por, për garën e së dielës, Leclerc kërkon të evitojë shkëndijat brenda skuadrës dhe shprehet se dy pilotët e kokëkuqjes nuk duhet të luftojnë ashpër pasi i vetmi që përfiton është Red Bulli i Verstappen.
“Ka për të qenë një garë e gjatë dhe menaxhimi i gomave do të marrë shumë rëndësi. Pikerisht për këtë arsye, besoj se nuk mund t’ia lejojmë vetes një duel aq të nxehtë brenda skuadrës. Ne humbëm kohë dhe Max e menaxhoi shumë mire ritmin. Megjithatë, u duk sikur u përmirësuam nga fundi, por nuk e di nëse do të mjaftojë për garën e së dielës”, u shpreh Leclerc. Kujtojmë se garën në pistën Spielberg të Austrisë mund ta ndiqni në RTSH nëpërmjet platformës Digitalb.
