Në fillim të Kupës së Amerikës, thuajse nuk e njihte askush në Europë, përveç Leonardos, që tentoi ta sjellë te Milani për 35-40 milionë euro, por u refuzua nga Administratori i kuqezinjve, Ivan Gazidis.
Bëhet fjalë për sulmuesin brazilian të Gremios, Everton, i cili e nisi kompeticionin nga stoli, por e mbylli si protagonist, duke u shpallur edhe kryegolshënues i Kupës së Amerikës.
“Për momentin jam një futbollist i Gremios”, tha Everton në përfundim të finales ndaj Perusë, duke vënë në dukje se u kishte kërkuar menaxherëve të tij, që të mos e bezdisnin me zëra merkatoje gjatë Kupës së Amerikës.
Tashmë Everton po ndiqet me vëmendje nga klube si Napoli, Manchester City, etj., ndërsa vetë sulmuesi brazilian pranon se ende nuk po e beson atë që po i ndodh.
Nga ana tjetër, Gremio “fërkon duart”, pasi nga shitja e sulmuesit anësor, tani pritet të përfitojë minimalisht 60 milionë euro, shifër që mund të rritet nëse shtohen skuadrat e interesuara.