Futboll

Duka falenderime për Finon: Garë sportive, ta marrim me sportivitet

Futbolli mbi të gjitha. Zhvillimi i mëtejshëm i sportit më popullor mbetet prioriteti i Armand Dukës, pavarësisht se gara për mandatin në krye të Federatës së Futbollit që po hyn në fazën e nxehtë, ku pas rikandidimit të presidentit aktual, kandidaturën e tij e shpalli zyrtarisht edhe ish-kryeministri dhe aktualisht deputet i së majtës, Bashkim Fino.

Armand Duka

“Pyetjet për fushatën i lëm për më mbrapa. Marrëveshja me Kryqin e Kuq është më e rëndësishme për futbollin sesa vetë zgjedhjet”.

Pas marrëveshjes së firmosur me Kryqin e Kuq për të vijuar bashkëpunimin për dhënien e ndihmës së parë në ndeshjet e Kombëtareve të të gjitha niveleve, por edhe në Kategorinë Superiore, përveç falënderimeve për rivalin në Asamblenë Zgjedhore, Duka kërkoi që procesi të mos karakterizohet nga debati. Sipas kreut të futbollit në vend, nevojiten diskutime konstruktive dhe duke qenë një garë sportive, gjithçka duhet marrë me sportivitet.

Armand Duka

“Sot kemi ardhur për një marrëveshje me Kryqin e Kuq, për të rritur standardet e futbollit, për të ndihmuar ekipet me sa më shumë asistencë mjekësore në raste emergjencash në fushën e lojës. Mendoj se duhet t’i japim vëmendje këtij aktiviteti. Për të gjitha gjërat e tjera do të kemi kohë të flasim për fushatë. Dua ta falënderoj Finon që është kandidat dhe ka ndërmarrë këtë hap. Në çdo hap do të kemi mundësi që të diskutojmë. Rëndësi ka që standardet e futbollit të realizohen. Është garë sportive dhe duhet ta marrim me sportivitet”.

To Top