Trajneri i Kukësit Shpëtim Duro, në një intervistë për “Gol pas Goli” nuk e fshehu kënaqësinë që skuadra e tij e nisi kampionatin me këmbën e mbarë, duke marrë 3 pikët pikërisht përballë kampionëve në fuqi, Partizanit.
Ndryshe nga Superkupa, sot duhet të jeni i kënaqur edhe me lojën, edhe me rezultatin…
Është e vërtetë, pasi javën e kaluar humbëm në mënyrë të pamerituar, por sot treguam vlerat tona, duke marrë një fitore tërësisht të merituar. Unë e kam thënë edhe më herët, që skuadra ka cilësi dhe këtë e tregoi edhe sot, ndonëse kemi vetëm 10 ditë që punojmë dhe disa lojtarë kanë ardhur rishtazi.
Skuadra duket se vuan ende finalizimin…
Është e vërtetë, pasi mund të kishim shënuar më shumë. Në pjesën e dytë bëmë disa kundërsulme në superioritet numerik, por nuk arritëm të shkojmë si duhet në zonë, ose nuk arritëm të dërgojmë topin në rrjetë. Me kalimin e minutave u tërhoqëm disi, pasi çunat donin ta fitonin patjetër ndeshjen dhe nuk rrezikuam pësimin e golit.
A ka stol të plotë Kukësi?
Partizani është skuadër e konsoliduar, ka stol dhe madje Asani ishte në tribunë. Kjo tregon skuadrën e Partizanit. Ne nuk kemi organikën e duhur dhe na është dëmtuar Musolli. Të shikojmë si do jetë gjendja e tij. Nesër shpresoj të na bashkohet Abazaj. Gjatë javë do shikojmë ndonjë lojtar tjetër që të kompletohemi për vazhdimësinë e kampionatit.
Cili lojtar ju ka pëlqyer më shumë?
Et’hemi është superlojtar, është superdjalë. Këto 2 ndeshje luan në pozicion të ri. Edhe në Superkupë edhe sot, ka qenë problemi kryesor për Partizanin. Është futbollist që luan në shumë pozicione. E kam ndjekur me simpati edhe kur s’kam qenë trajner i Kukësit, por me këtë pozicionin e ri ka qenë super.
Ndeshjen e kaluar pësuat 4 gola, ndërsa sot nuk ia lejuat asnjë rast kundërshtarit. Çfarë ndryshuat?
Ndeshja e Superkupës ishte një tjetër histori, pasi kishte më shumë spektakël, por aty vuajtëm shumë në shtesë, ku unë i druhesha mangësive fizike të skuadrës. Sot ishte një histori tjetër, ku skuadra u tregua shumë më e kujdesshme dhe për më tepër, kemi punuar më shumë dhe jemi rritur në aspektin fizik.
Kur e pret Kukësin më të mirë?
Unë nuk do t’i doja këto dy përballje me Partizanin, pasi ishte një kohë e shkurtër, por shorti ishte i tillë. Shpresoj që të marrim pikët edhe në dy ndeshjet e ardhshme, sepse pas ndërprerjes, do të kemi mundësi të arrijmë nivelin më të mirë, edhe me afrimet që presim të bëhen.
Si e shikoni Gjicin, tani që e keni presidentin tuaj?
Unë me presidentin jam takuar vetëm ditën e parë, para 20 ditësh, por e vlerësoj si një njeri korrekt dhe ambicioz, që ka cilësitë dhe karakteristikat e tij. Ai do vetëm të fitojë dhe këtë ua kam bërë të qartë edhe futbollistëve të mi, që mbijetojmë vetëm nëse fitojmë. Unë e kam pranuar sfidën time, por sido që të shkojë, kam ruajtur marrëdhënie të mira me të gjithë presidentët e klubeve që kam punuar.