“Jam shumë i lumtur me fitoren, sepse e kam thënë vazhdimisht që në Superiore nuk ka ndeshje të lehta. Përballë kishim Vllazninë që ka disa element pozitivë në përbërje, madje 2-3 prej tyre i kemi pasur edhe ne si objektiv për t’i afruar gjatë verës. Jam i bindur se shkodranët nuk e meritojnë atë vend në renditje, me përbërjen që kanë”, u shpreh Duro.
Flamurtari rimerr vendin e dytë dhe konfirmon forcën e saj, por trajneri Duro shprehet se skuadra mund të kishte disa pikë më shumë, nëse arbitrat nuk do të ishin bërë protagonistë. Sa i përket merkatos, Duro konfirmoi se nesër vjen te vlonjatët një futbollist mjaft i mirë dhe i shtrenjtë, që pritet të ndihmojë ekipin dhe të rritë konkurrencën.
“Mendoj se mund të kishim më shumë pikë, kur kam parasysh disa barazime të tepërta, por edhe disa gabime vendimtare të arbitrave, që na kanë kushtuar shtrenjtë. Unë e kam fituar bastin tim, pasi ndërtova një ekip me lojtarë që nuk e njihnin superioren dhe ia kemi dalë më së miri. Nesër presim që ekipit t’i bashkohet edhe një tjetër lojtar i shtrenjtë, që do të na ndihmojë shumë në pjesën e mbetur të kampionatit”, tha Duro.
