Shpëtim Duro shprehu keqardhje që i shkaktoi humbjen e 3-të Partizanit, por tregoi se si profesionist është në shërbim të Flamurtarit. Ai u shpreh i kënaqur për mënyrën e lojës dhe mbi të gjitha për 3 pikët mjaft të rëndësishme, aq më tepër ndaj një rivali direkt.
“Natyrisht që më vjen keq, që i shkaktuam humbjen Partizanit, për shkak të të kaluarës time këtu, por si profesionist mund të them se isha i motivuar të fitoja me Flamurtarin. Zhvilluam një ndeshje të mirë dhe ishim përgatitur edhe psikologjikisht, që të vijmë për fitore në Tiranë”, tha Duro.
Trajneri i vlonjatëve nuk e mohoi se njihte mirë mirë forcat e Partizanit, por sërish meritat ia atribuoi grupit të tij të lojtarëve, për fitoren e marrë në kryeqytet.
“E njihja lojën e Partizanit dhe kërkova që të nxirrnim jashtë loje Trashin, që kishte qenë më i miri në këto ndeshje të fundit. Me këtë veprim ne kufizuam shumë rrezikshmërinë e të kuqve, ndërsa menaxhuam mirë lojën dhe mund të kishim shënuar edhe golin e dytë. Kam një skuadër të ndërtuar mjaft mirë, që mund të shkojë shumë larg. Ne nuk kemi objektiva për renditjen, por oreksi vejn duke ngrënë dhe me kalimin e javëve do të shohim se çfarë mund të synojmë”, tha trajneri i Flamurtarit.
