Schalke 04 nuk e ka nisur aspak mirë futbollin pas pandemisë, sepse menjëherë në dy ndeshjet e zhvilluara ka numëruar po kaq humbje, teksa më shumë djeg kjo e pasdites së sotme, me rezultatin e thellë 0-3 përballë Augsburgut.
Pas disfatës javën e kaluar në derbin e Ruhrit ndaj Borussias së Dortmundit, sot pritej reagimi i “bluve”, që priten në “Gelsenkirchen” Augsburgun, por në ftohtësinë e impiantit pa tifozë, ndeshja shkoi tërësisht në favor të miqve.
Augsburg kaloi në avantazh që në minutën e gjashtë me anë të Lowen, ndërsa më pas erdhi reagimi i Schalkes, që krijoi volum loje dhe raste, por pa arritur të dërgojë topin në rrjetë dhe të rikthejë baraspeshën.
Shpresat e vendasve për të mos dalë pa pikë nga ndeshja në shtëpi u venitën në minutën e 76’, kur Sarenren-Bazee shënoi golin e dytë për Augsburg, ndërsa Cordova vulosi rezultatin 0-3 me golin e shënuar në minutën e parë shtesë.
