Një sulmues ganez dhe një mesfushor rus për të mbyllur me dy goditje cilësore merkaton e dimrit dhe për të kompletuar skuadrën për vazhdimin e sezonit. Luftëtari ka shpërthyer në fund duke afruar në skuadër ish lojtarin e Celta Vigos, 26-vjeçarin Eric Warden ndërkohë që bluzinjtë kanë siguruar edhe shërbimet e mesfushorit me tipare sulmuese i cili luan edhe nga krahët Vladimir Esin. 24-vjeçari në pjesën e parë të sezonit ka luajtur te Dinamo Stavropol, një klub ku militon në Ligën e Dytë ruse. Më parë Esin ka qenë pjesë edhe e FK Kaluga në të njëjtën ligë. Përsa i përket sulmuesit ganez që presidenti Grigor Tavo ka vendosur në dispozicion të trajnerit të ri Julian Ahmataj Eric Warden ai e ka nisur karrierën te Celta Vigo ku është aktivizuar për disa takime me skuadrën e dytë të klubit galician për tu transferuar më pas në Greqi ku ka qenë pjesë e shumë skuadrave sidomos në Football League(kategoria e dytë greke), ku spikasin Levadiakos, OFI i Kretës dhe Olympiacos Volos.
