Java e 22-të e IPKO Superligës së Kosovës, që nisi të shtunën me Ferizaj – Trepça ’89 4-0, kulmon këtë të diel me dy takime plot rivalitet, Drita – Prishtina dhe Llapi – Gjilani, që do të zhvillohen në orën 14:00.
Në Gjilan atmosfera pritet të jetë e zjarrtë, pasi përplasen di rivale për titullin kampion e që ndahen nga vetëm një pikë në renditje. “Intelektualët”, pas humbjes që pësuan përballë Ballkanit rrëshqitën nga vendi i dytë në të katërtin, duke u parakaluar pikërisht Prishtina dhe rivalët ndërqytetas të Gjilanit. Skuadra e drejtuar nga Ardian Nuhiu, gjithsesi nuk është dorëzuar sa i përket luftës për titullit, madje një sukses i mundshëm sot ndaj Prishtinës do t’i jepte moralin e duhur për të besuar edhe më shumë në suksesin përfundimtar.
Nga ana tjetër, kryeqytetasit, të drejtuar nga Armend Dallku, kërkojnë fitoren e vazhdimësinë në një fushë ku nuk dalin fitimtare që nga prilli i vitit 2017.
Drita është skuadra më në formë si vendase, duke mos pësuar humbje në shtëpi që nga java e parë me Ferizajn (0-1). Prej asaj kohe, nga 10 ndeshje ka pasur vetëm një barazim me Trepçën ’89 (1-1) dhe 8 fitore.
Por, Prishtina, në anën tjetër, është skuadra më e mirë si mysafire, duke pësuar vetëm 5 gola dhe duke mos pësuar humbje që nga ndeshja me Ballkanin (1-0).
Mjaft interesante edhe përplasja mes Llapit dhe Gjilanit në Podujevë. “Skifterët” (renditen të dytët) udhëtojnë për maksimumin e pikëve në një fushë të vështirë, pasi nuk duan të lejojnë me tej shkëputjen e Ballkanit, apo që t’i parakalojë Prishtina apo Drita. Nga ana tjetër, Llapi nuk i ka shuar shpresat për një vend në Kupat e Europës, aq më tepër që matematika e lejon të besojë edhe për titullin, ndonëse duket një mision i pamundur.
