Në harkun e 8 ditëve Juventusi i Massimiliano Allegrit do të luajë tre sfida shumë të rëndësishme që do të vendosin jo pak për fatet e sezonit të bardhezinjëve. Të premten do të jetë Napoli më pas Olympiacos në Champions League ku në lojë është bileta e kualifikimit dhe të shtunën e 3 dhjetorit në Juventus Stadium do të zbresë, Interi i Spallettit. Ndeshjet merren me rradhë dhe në kampin e kampionëve të Italisë vëmendja është e gjitha te dueli i San Paolos ndaj të kaltrve të Sarrit. Paulo Dybala autori i 12 golave në këtë sezon të Serisë A dhe njëkohësisht ylli i këtij Juventusi beson edhe pse e di që do të jetë e vështirë, sipas sulmuesit argjentinas, bardhezinjtë do të shkojnë në San Paolo për të fituar.
“ Do të jetë e vështirë pasi Napoli në shtëpinë e tij, luan një futboll të bukur.Mungesa e Higuain? Shpresoj që të rikuperohet në kohë dhe të jetë i gatshëm për këtë sfidë. El Pipita për ne është një lojtar shumë i rëndësishëm, sezonin e kaluar ka shënuar gol ndaj Napolit dhe shpresoj që të luajë dhe të na ndihmojë me praninë e tij në fushë”.
Respekt për Napolin por aspak frikë. Edhe pse të kaltrit po zhvillojnë një sezon të shkëlqyer në të cilin synojnë të fitojnë titullin, drejtori i përgjithshëm i Juves, Beppe Marotta theksoi se sfida e San Paolos nuk do të jetë deçizive pasi sezoni është ende shumë i gjatë, ndërsa shtoi se e di që do të jetë një ndeshje e vështirë, por sipas drejtuesit bardhezi, Juventusin nuk e tremb aspak ky Napoli. Për mediat përpara kësaj sfide foli edhe mesfushori boshnjak Miralem Pjanic i cili shfaqi të gjithë besimin e tij te skuadra, duke nënvizuar se Juvja në San Paolo do të shkojë për tre pikët.