Që Reali praktikisht i tha lamtumirë titullit në La Liga që me humbjen 0-3 në El Clasico kjo ishte mëse e qartë, por që diferenca e Los Blancos me Barçën pas ndeshjes së parë të 2018-ës në kampionat do të shkonte 16 pikë, kjo vështirë se do të besohej. Skuadra e Zinedine Zidane barazoi 2-2 në fushën e Celta Vigos duke mos qenë e aftë të ruante avantazhin e pjesës së parë falë një dygolëshi të Gareth Bale.
Në minutën e 33-të pas një kundërsulmi vrasës Wass i shërbyer nga Aspas tregoi klasin e tij me një parabël që e nxorri jashtë lojë portierin Navas, duke zhbllokuar sfidën në favor të Celtas. Kundërpërgjigjja e Realit ishte e menjëhershme me Gareth Bale që realizoi dy gola brenda dy minutave lojë, pikërisht në të 36-ën dhe 38-ën.
Speklakli në “Balaidos” vijoi me 11-metërshin e humbur nga Iago Aspas në të 72-ën, megjithatë Celta gjeti forca për të barazuar 10 minuta më vonë me Gomez.
Cristiano Ronaldo dhe Lucas Vasquez patën shansin për t’i dhënë fitoren Realit, por portieri Blanco me pritjet e tij nuk lejoi prekjen e rrjetës.