Tirana nuk ndalet në “Abissnet Superiore”. Bardheblutë e Orges Shehit fituan në transfertë 0-2 ndaj Erzenit për të forcuar pozitat në krye të renditjes dhe për ta çuar në 4 pikë diferencën me Partizanin. 26 herë kampionët e Shqipërise përfituan në maksimum nga hapi fals i “Demave” përballë Teutës dhe në sfidën e luajtur në “Niko Dovana” iu falën golave të Florent Hasanit. Fillimisht, sulmuesi realizoi nga pika e bardhë e penalltisë në minutën e 84-t dhe më pas vulosi triumfin në minutën e pestë të kohës shtesë.
Në Durrës u zhvillua një takim tepër i luftuar, me Erzenin që vuri jo pak në vështirësi Tiranën, teksa në pjesën e parë goditi dhe traversën. Megjithatë në fund e bënë diferencën cilësitë e Tiranës në fushë që marrin tri pikë mjaft të rëndësishme. Për bardheblutë e nisi nga minuta e parë transferimi i janarit, Regi Lushkja, ndërsa në pjesën e dytë debutoi dhe Kristal Abazaj.
Tirana ngjitet në kuotën e 34 pikëve dhe krijon një shkëputje prej 4 pikësh me Partizanin në krye të renditjes, ndërsa nga ana tjetër Erzeni mbetet në vendin e 5-të në kuotën e 26 pikëve.
