Në kryendeshjen e javës së 31-të të Superiores, mes Skënderbeut dhe Kukësit, në stadiumin korçar ishin të pranishëm shumë mysafirë specialë. Bëhej fjalë për drejtues sportivë, skautë dhe menaxherë klubesh, që kishin si synim të ndiqnin edhe njëherë lojtarët që kanë mbajtur nën vëzhgim gjatë gjithë sezonit.
Përfaqësues të klubeve gjermane, austriake, belge dhe italiane mbushnin shkallët e stadiumit ‘Skënderbeu’, teksa vëmendja ishte përqendruar te 6 prej lojtarëve që ishin në fushën e blertë.
Bëhet fjalë për Gavazajn, Lilaj, Alitin dhe Micin e Skënderbeut, por edhe Gurin e Rrumbullakun e Kukësit, futbollistë që kanë spikatur këtë sezon me skuadrat respektive, duke i dhënë tonin Kategorisë Superiore.
Që të 6 këta futbollistë janë me valixhet gati, ndërsa mbetet të përfundojë sezoni dhe të përcaktohet destinacioni konkret i tyre. Transferimi I disa futbollistëve të kampionatit shqiptar, në skuadra të Europës, ka bërë që të rritet më shumë vëmendja ndaj Superiores, ku përveç këtyre të 6-ve, edhe të tjerë futbollistë janë në listën e menaxherëve të huaj.
Kështu Bregu, Rroca dhe Ramadani te Luftëtari, Asani, Bardhi e Trashi te Partizani, Selmani, Kallaku e Uzuni te Laçi, por edhe Krymi, Çinari e Sherri te Vllaznia, janë të tjerë futbollistë të kampionatit shqiptar, që me shumë gjasa nuk do t’i shohim më në Superiore sezonin e ardhshëm.