Gian Piero Gasperini drejton prej 3 vitesh Atalantën, duke e çuar skuadrën në nivele të larta, pavarësisht se çdo verë përballej me një eksod të lojtarëve më të mirë.
“Qershia mbi tortë” ishte këtë vit, ku pas një sezoni perfekt, bergamaskët arritën të sigurojnë vendin e tretë dhe rrjedhimisht pjesëmarrjen në Champions League, ndërsa dolën edhe në finalen e Kupës së Italisë, të cilën e humbën përballë Lazios.
Kanë mjaftuar këto fakte, që shumë skuadra të kthejnë sytë nga tekniku zikaltër, ndërsa në “pole” për shërbimet e tij, duket se janë verdhekuqtë e Romës, të cilët sapo kanë mbyllur bashkëpunimin me Claudio Ranierin.
Për të ardhmen e trajnerit Gasperini, u pyet sot edhe presidenti i Atalantës, Antonio Percassi, i cili nuk dha detaje, por u kërkoi gazetarëve që të presin deri nesër, për të mësuar më shumë.
“Hajdeni nesër për të mësuar më shumë. Kam besim se do të vijojmë bashkë rrugën që kemi nisur, por nesër do të vendoset gjithçka”, u tha Percassi gazetarëve.